Nagbago Agad Isip Ko Eh

Mahal kong talaarawan,

        9:30 na ng umaga ako nagising. Kumain muna ako ng pandesal at palabok. Niyaya ako ni papa na magbisekleta papuntang Antipolo pero parang hindi ko gustong magbisekleta ngayon kaya hindi muna ako sumama. Pagkalipas ng tatlong minuto, parang nainggit ako kay papa at nagbago ang isip ko kaya sabi ko kay mama na magbibiseklata na nga lang din ako. Paakyat na ko ng kalsada ng madaanan ko si papa kasi may kinausap siya sa daan na kakilala niya kaya hindi pa siya tuluyang nakakaalis. Sumabay na rin ako sa kanya ng pag-alis pero hanggang Valley Golf lang ako kasi hindi ako nagpaalam kay mama na lalabas ako sa lugar namin. Pagbaba ko galing Valley Golf ay dumiretso ako ng Masinag. Hindi naman kasi gaanong malayo yon kaya dumiretso na ko run kasi medyo matagal na rin naman akong hindi nakakapag-ehersisyo. Pag-uwi ko sa bahay, nagpahinga muna ako ng konti at nangapitbahay na. Maya-maya ay tinawag ako ni mama para patulungin sa bahay. Pinakuha niya ako ng malunggay sa puno ng malunggay (malamang) namin, pinalamas ng puso, at naggata ng niyog. Tumulong na rin ako sa pagluluto. Pagkatapos ay natulog ako ng hindi pa kumakain.

        2:30 na ako nagising at saka pa lang kumain ng pananghalian. Naghanda kami ni ate at pumunta na ng aming simbahan. Pagkarating namin ay nagpraktis na kami ng mga tutogtugin namin bukas. Pagkatapos magpraktis ay naghanda na kami ng pagkakainan namin. Habang naghahanda ay dumating si ate Mai kasama ang mga kabataan sa simabahan nila at hindi nagtagal ay umalis din naman sila maliban kay ate Mai kasi nga siya yung nagseseminar sa amin. Kumain kami at sinimulan ang sesyon. Pagkatapos ay inayos na namin ang loob ng simbahan para hindi na kami gumising ng sobrang aga bukas para maghanda at natulog na ako.